Parlant e brezhoneg asambles gant Rahung Nasution

Evit ar wech kentañ e vo aozet unan deus divizoù ar mintin gant un den pedet e brezhoneg nemetken, jubennet diwar ar saozneg. Un dibab politikel eo evit kinnig oberiantizoù e brezhoneg en ur gouel a sell deus ar pobloù, ar sevenadurioù hag ar yezhoù minorelaet dibaoe ouzhpenn 35 bloaz zo.
Un taol-arnod eo ha ma teuomp a-benn da leuniañ ar sal ar bloaz-mañ e c'hellimp aozañ seurt emgavioù evit ar vrezhonegerien evit pep gouel en amzer da zont marteze.

D'al Lun 25 a viz Eost, 10 eur vintin, Ti an Dud (MJC) e Douarnenez

Photo


Rahung Nasution a zo pedet da zont da gomz ganeomp. Batak eo Rahung, deus enez Sumatra. Filmaozer ha beajour, sot eo gant ar pezh a ra sevenadurioù an tu-se deus ar bed.
Ur film en deus bet savet war tatouadurioù ar Ventawaïed, a zo o chom war an enez Siberout (Mentawaï Tatoo revival), unan all war fin sevenadur hengounel an Dayaked deus enez Borneo (The Tribal). Skignet e vo ar filmoù-se e-kerzh ar Gouel.
Aozet en deus bet atalieroù filmañ gant Bapoued en Papoua ar Reter e-lec'h ma oa bet toullbac'het gant gouarnamant Indonezia. E Timor ar Reter e oa o chom pa oa bet an dispac'h er bloavezhioù 1999 ha 2000.
Pa na vez ket o sevel filmoù e ya a enezenn da enezenn, ha skrivañ a ra ur blog war doareoù keginañ pobloù an Enezeg.
Jubennet diwar ar saozneg gant Stefan Moal ha Ninnog Latimier.